Cantar de Mío Cid (Original)

De los sos ojos tan fuerte mientre lorando, tornava la cabeça i estava los catar. Vio puertas abiertas e uços sin cañados, alcandaras vazias, sin pielles e sin mantos, e sin falcones e sin adtores mudados. Sospirò mio Çid, ca mucho avié grandes cuidados, fablò mio Çid bien e tan mesurado: —¡Grado a ti, Señor, Padre que estás en alto! Esto me han buelto mios enemigos malos.— Alli piensan de aguijar, alli sueltan las rriendas. La exida de Bivar, ovieron la corneja diestra, e entrando a Burgos, ovieron la siniestra. Mecio mio Çid los ombros e engrameò la tiesta: —¡Albricia, Albar Fañez, ca echados somos de tierra!—